Ontstaon

Repke Tepke

Oos zaate hermenie is in 2001 mit de Paose ontstange. Toen weer biej ôs in Pej oppe Kirmès woore. Toen hawwe weer ’t deraover om ein Zaate Hermenie te beginne. Bart (Sevriens) dae haw nog get geldj aover en duudje det in zonne griepautomaat. Want dea stong oppe Kirmès! En roaj èns waat hae der oet haolde? Het woor eine ELMO.

Vanaaf det moment begôs de kwatsj allemaol. Weer zoewe ein Zaate Hermenie op gaon richte. En es weer in Pej get aafspreake, den doon weer det auch. Eeder waek hawwe weer het deroaver, wieniae weer der mit zoewe beginne. Nog effe aover dea elmo, det woor vanaaf det moment ooze mascotte, dae haet nog get mitgemaaktj die vakansie! Dae is toen aoveral mit haer gewaes, zelfs nao Bobbejaanlandj en ’s aoves nao de Music Night in Ech. Toen is d’er geduiptj gewoore in de fontein en later biej Frits (kebabtent Urfa). Dae Elmo woor op ein gegaeve moment neet miae in orginele staot. Hae haw nog mer ein aug en hae leakdje zaegmael. Mer det weerhaodje os der neet van om toch ein Zaate Hermenie te beginne.

Wer keeke oppe kalender en wer zooge det het al oktoaeber woor. Det beteikendje det het Kirmès woor aan de angere kantj van het spoar (voar minse die det neet weite, dit woor in Ech). Op dees kirmès stong aug weer eine griepkraam. Mit ELMO’s! Toen de kirmes aaf woor geloupe hawwe weer ein toet mit zeker 7 elmo’s. Auch zooge weer eine Kop van Jut oppe kirmes staon. Voar 5 gulje ( € 2,27) kos se op dae Kop howwe. Daonao kos se dich get oetzeuke. Waat bleek noe? Dao looge sjoan mûtse in het roead, gael en greun. Dus mit anger weurd: toen weer wegginge hawwe weer ein toet mit plusminus 7 elmo’s en 17 mutse (mentj Bas).

Op eine sjöäne aovendj höbbe weer os biejein gepaktj en zeen inne eine auto gestaptj (Bart voor, want Frank woor veur de 2de kier gezaktj) en noa Strandjpoal 11 ( Bölke) gevaare. Dao höbbe weer os omme taofel gezatj en os dér eine gedrônke. Toen höbbe weer aan dae vruntjelikke Bölke gevraogdj of weer Strandjpaol 11 es oos vaste rippetisielokaal moogdje beneume. Bölke vonj het ein fantasties idee en vanaaf det moment hawwe weer ein stamkroeg. Weer höbbe os daonao biejein gepaktj mit ein paar men en zeen dao begôs mit rippetere, naodet wer get partieje geregeldj hawwe. Noe kentj ger os es Zaate Hermenie Repke Tepke oet Pey.

Dit zeen weer aan de vaoraovendj van de Vastelaovendj 2009