Niels löptj nao de maon

 

Niels löptj nao de maon
Pey – ’t Thaal

Niels en Janou gaon in 2011 trouwe. Det is neet niks, en het koppel kiktj dao den auch ech haer oet. Pasgeleeje woor det echter totaal anges, want Janou ergerdje zich aan ’t vleis det Niels altied bie de Jan en de Emté koch. Det woor namelijk totaal ongeliek! Es zie biejväörbeeldj get schnitzels kochte, den pakdje Niels altied det pak wo de meis ongelieke schnitzels inzoote! Het resultaat woor dennao het bakke in de pan det d’r eine schnitzel de tejjer oproldje en bienao neet zichtbaar woor, en de angere schnitzel zelfs aan allebei de kèntj van de teijer ( kan det? ) äöver stook.

Janou woor het op ein gegaeve moment zoa meug, det het taege Niels reep: ‘Ach, loup toch nao de maon!’. ’t Wis op det moment neet det Niels det zinke waal erg serieus op nom. Niels is de daag d’rnao namelijk biej Wobbu Ekkols langsgewaes – dae woontj sinds kort auch in ’t Thaal… waem namelijk neet – en dae haef zien groatste astronoutenpak gehaoldj. Niels is dao resoluut ingeklomme en aan de lang reis begosj om nao de maon te loupe.

Ein paar waeke later zoog Janou bie Sjownuuts op BSB9 det ze eine verdwaaldje astronout hawwe gespotj in ’t grensgebied van Frieslandj mit Groningen. Oeteindelijk bleek det Niels te zeen, dae in 2 waeke tied tot aan Frieslandj woor geloupe. Volledig mit astronoutenpak aan en al. Janou is toen es eine haas nao Frieslandj aafgereisj om ziene leeve Niels op te haole. Nao 10 kieër “Sorrie” te höbbe gezag zeen ze samen lekker heives gegange. Al zeen ze zich ongerwaeges nog eine lekkere schnitzel gaon aete in ein of anger waegrestaurant. Eine gelieke schnitzel dit kieër!

 
Hie Niels in zien astronoutspèkske